Главные новости Карасуского района – Qostanai Media

Жаздың шіліңгір ыстығында аудан жұртшылығының көбі түс ауғаннан кеш қарайғанға дейін Қарасу өзені  жағасынан табылады.

Бір тобы өзен жағасына суға түсіп, салқындау үшін барса, енді бірі балық аулау үшін барады.

Ал, ең жиі баратындар – табиғат аясына демалуға шыққандар. Олар сусындары мен тамақтарын алып, сол жерден сірне, кәуаптарын пісіріп, көл жағасында 7-8 сағатқа дейін жатуға бар.

Әрине, демалған жақсы-ау. Алайда, демалушылар қауіпсіздік, тазалық деген талаптарды ескере ме, жағажай мәдениетін қалай қалыптастырамыз? Біздің демалысымыз тек көңілді ғана өтіп қоймай, қауіпсіз, жағажай этикасын сақтайтын, жанға жайлы жағдайда өтуі керек.

Осы орайда Қарасу ауданының Черняев ауылдық округі жұртшылықа үлгі боларлық тың бастаманы қолға алды. Атап айта болсақ жергілікті әкімдік пен “Бірлік-Өмір” ЖШС  бірлесе Қарасу өзенінің жағалауында Черняевкада (Ленино) жергілікті тұрғындардың күшімен тамаша жағажай жасап шықты.

“Жылдағы бір көрініс. Толған күл-қоқыс, шашылған шөлмектер, от жағылған орындар. Қоқыстан аяқ алып жүру мүмкін емес. Суға түсу науқанында қауын-қарбыздың қабығы, мүжілген сүйектер, шемекі қабығы, темекінің тұқылы дейсіз бе бәрін жағажайдан табуға болады.

Енді ауыл тұрғындарының бірілігінің арқасында біздің ауылда тамаша жағажай бар. Сырттан келген қонақтарға ұялмай көрсетуге болады.

Ең бастысы осы табиғат сыйлаған байлығымызды көзіміздің қарашығындай сақтау әрбіріміздің парызымыз» дейді ауыл тұрғыны Вениамин Ермолин.

Жоғарыда аталған тазалық, қауіпсіздік мәселесінің негізгі шешімі – заңды жағажай жасақтау. Ал оған бізде мүмкіндік бар.

«Қолда бар алтынның қадірі жоқ» демекші, емдік қасиеті, суы, балығы секілді байлығымыздың қадірін білмейтініміз қынжылтады. Тек осы істің көзін тауып, айналдырып әкететін епті кәсіпкер керек. Өзен бойының айналасын қоршап, тазалап қойса, дайын демалыс орны болып шыға келетін жерлер жетерлік.

Содан кейінгі тірлік кәсіпкердің идеясы мен іскерлігіне байланысты. Жағажайға келуді ақылы қылып, түрлі сусындарды салқындатып, кәуап пісіріп, демалушылардың жағдайын жасар болса, ақша өзі келеді. Тіпті шағын тапшандар мен киіз үй құрып, бие байлап, саумал сатуға да болады. Бір қарағанда мұның бәрі жай қиял көрінуі мүмкін. Алайда шындап кірісер жан болса, ақиқатқа айналып шыға келеді. Себебі бұл біріншіден, ауданда жоқ бизнес.

Екіншіден, кәсіпкер боламын деген жанға мемлекет тарапынан жан-жақты қолдау баршылық. Сол мақсатта түрлі бағдарламалар қабылданып, төмен пайызбен несиелер беріліп, кәсіпкерге бұрын-соңды жасалмаған қамқорлық жасалуда.

Үшіншіден, осы бастама шынымен жүзеге асса, демалушылар келмей қалады деп уайымдамайсың. Себебі, сенің жағажайыңнан басқа жерлерге суға түсіп, демалыс ұйымдастыруға заңды түрде тыйым салынады. Сондықтан, дүйім жұрт сенің саудаңды қыздырып, қызметіңді пайдаланады. Міне, осы мүмкіндіктерді пайдаланып, аталмыш бизнес қолға алынса, халыққа да, көлге де пайдасы мол болар еді.

Осындай пайдасы мол ауданымыздың ресурсын назардан тыс шығармай, жағдай жасасақ, нұр үстіне нұр болар еді.

Заңды жағажай ашылар, ашылмас, бастысы, өзен жағасында демалушылар тәртіп пен тазалыққа аса мұқият қарағаны дұрыс.

Мешіт Ғазизұлы

Суретті түсірген Черняев ауылдық округінің әкімдігі