Главные новости Карасуского района – Qostanai Media

Өз өмірін қоғамдық тәртіпті қамтамасыз ету жолына арнаған полиция аға лейтенанты Ернар Досов

Күні-түні қоғамдық тәртіпті қадағалап, қылмыстың бетін ашып, азаматтардың қауіпсіздігін қамтамасыз ету жолында қызмет етіп жүрген жандар жетерлік.

Солардың бірі – полиция аға лейтенанты Ернар Досов.

Жаста болса, алдына биік мақсат қоя білген Ернармен жақында арнайы кездесіп, аз-кем әңгімелескен едік.

Ернар Ерланұлы 1994 жылы Амангелді ауданында дүние келген. Ол полиция қызметкері болуды мектеп қабырғасында жүрген кезінен бастап армандапты.

Сондықтан болар, жастайынан осы салаға қызығушылық танытып өсті. Осылай асыл арманның жетегінде жүріп, үлкен мақсаттарға жетуді аңсаған Ернар 2012 жылы мектепті тәмамдаған соң, білімді маман атану үшін Қарағанды қаласына аттанады. Арман қуған жас өзінің қалаған мамандығы бойынша Қарағандыдағы полиция академиясына «Құқықтану» мамандығы бойынша оқуға түседі. Аталған оқу орнын 2016 жылы ойдағыдай тәмамдап, жоғарғы білім алып шығады.

Сөйтіп, өз өмірін қоғамдық тәртіпті қамтамасыз ету жолына арнауды мақсаты еткен ол еңбек жолын Арқалық қаласы полиция басқармасында жедел уәкіл болып бастайды. Мұнда жұмыс істеген 3 жылдың ішінде ол ішкі істер саласының қаншалықты маңызды екенін түсініп, күн сайын жаңа нәрсені үйренуге асық болып, тәжірибе жинақтады. Теориялық білімін тәжірибемен ұштастырып, тәртіп пен шыдамдылыққа үйренді. Бұл оның өзіне деген сенімділігін барынша арттырып, үлкен белестерге жетеледі.

Ернар қазіргі таңда Қарасу аудандық полиция бөлімі криминалдық полиция бөлімінің жедел уәкіл болып жұмыс істейді.

Өз ісіне тиянақты, асқан жауапкершілікпен қарайды. Жаста болса, білікті маман ретінде танылып үлгерген Ернардың бір күндік жұмысымен танысқан едік.

– Жұмысқа таңғы сағат 7.30-да келем. Одан кейін кезекші бөлімнен қару алып, сағат 7.45 сапқа тұрамыз. Онда бүгінгі істейтің жұмыстарымызды айтып, тапсырмалар береді. Сыртқы келбетімізді тексереді. Жаңа заң шыққан болса, оны да түсіндіреді. Бұдан бөлек, жетекшілік ететін орынбасарға кіріп, бір күндік жұмыс жоспарымызды құрамыз. Келіп түскен арыз-шағымдар бойынша жедел жұмыс істейміз. Қылмыс болған жерге барып, тергеу жұмыстарын жүргіземіз. Осындай қимыл үстінде, жедел шешімдер мен әрекеттерге барамыз. Жұмыс күні аяқталған соң, қызметтік қаруды тапсырамыз. Уақытымның көп бөлігі жұмыста өтеді. Жұмысым өзіме ұнайды. Тәртіп сақшысы болу – менің жүрек қалауым, – дейді Ернар Ерланұлы.

Жаңабай АХМЕТОВ
Суреттер автордікі