Главные новости Карасуского района – Qostanai Media

Жаңа 2020 жыл табалдырығымыздан аттағалы тұр

Жаңа жыл – шаттық пен қуанышқа толы ғажайып мерекелердің бірі. Бұл мерекені баршамыз жақсы ниетпен, көтеріңкі көңіл-күймен қарсы алуға тырысамыз.

Әне-міне дегенше, тағы бір ескі жылды тарих қойнауына тапсырып, Жаңа жыл да табалдырығымыздан аттағалы тұр.

Қазір аудан орталығында Жаңа жыл мерекесіне дайындық жұмыстары қызу жүріп жатыр. Бұл мерекені жасыл шыршасыз елестету мүмкін емес. Орталық алаңда мерекенің басты нышаны – алып шырша бой көтерді. Жылдағы әдетпен, барлық мекеме-кәсіпорындар түрлі-түсті жарық шамдармен, жылтырақтармен көмкерілген. Жаңа жылдық құттықтаулар мен жарнамалар да ілініп, келер жылдың әне-міне келерін еске түсіреді.

Сейсенбі күні Жаңа жыл шыршасының шамдарын жағу рәсімі өтті. Күннің суығына қарамастан әсем шыршаның шамын жағу салтанатын тамашалауға жиналған жергілікті тұрғындардың қарасы көп болды.

Салтанатты түрде Жаңа жылдық шыршаның шамы жағылып, әсем әндер шырқалды. Мерекелік думанда Аяз ата мен Ақшақар жиналғандарды мерекелерімен құттықтап, жұртпен бірге алаңдағы шыршаны айналып, би билеп, ән айтты.

Сондай-ақ түрлі ертегі кейіпкерлері де думанның көркін қыздыра түсті.

Міне, санаулы күндерден кейін 2020 жылға да қадам басамыз. Жыл соңында өткенімізге шолу жасап, болашаққа нық сеніммен қарап, Жаңа жылдан жақсы жаңалықтар, жаңа тілектер, үлкен үміт күтетініміз шындық. Сондықтан келер жыл ынтымағы мен бірлігі жарасқан халқымыз үшін сәтті жыл болып, әр шаңырақта береке-бірлік, шаттық пен қуаныш орнасын. Жақсылыққа ұмтылтатын, жаңаша ойлауға, тың қадамдар жасауға жетелейтін сәттеріміз көп болсын. Ортақ шаңырағымызда бейбітшілік пен келісім орнап, еліміз өсіп-өркендей берсін.

Жаңабай АХМЕТОВ
Суреттер әлеуметтік желіден алынды