Главные новости Карасуского района – Qostanai Media

Қарасу арнаулы әлеуметтік қызмет көрсету орталығы бұл мерекені ешқашан ескерусіз қалдырмайды. Аталған орталық ұжымы қарттарымыздың халықаралық төл мерекесін биыл да лайықты әрі өз деңгейінде қарсы алып, қарттарға ерекше құрмет көрсетті.

Қазыналы қариялардың құрметіне арналған мерекелік шара барысында орталықтың директоры Назира Утешева құттықтау сөз сөйлеп, игі тілегін білдірді.

– Егде адамдардың мәртебесін жоғары ұстап, оларға сый-құрмет көрсету – біздің алдымыздағы басты парыздардың бірі. Сіздер ұзақ жылдар бойы адал еңбек етіп, еліміздің өсіп-өркендеуіне айрықша үлес қостыңыздар. Жүріп өткен өмір жолдарыңыз өскелең ұрпаққа үлгі – өнеге. Сіздердің өмірден көрген-түйгендеріңіз көп, елге еңбектеріңіз сіңген, тәжірибелеріңіз мол. Сондықтан ел келешегі үшін еткен еңбектеріңізге мәңгі бас иеміз. Осынау айтулы мерекеде дендеріңізге саулық, мол бақыт, ұзақ ғұмыр, қажыр-қайрат тілеймін! Осындай қуанышты сәтте жылма-жыл кездесіп, халқымыздың ыстық ықыласына бөленіп, ортамызда аман-есен жүре беріңіздер!», – деді директор.

Бұдан кейін орталықтың қоғамдық өміріне араласып, өзінің ұқыптылығымен, белсенділігімен көзге түскен қарияларға грамоталар мен сый-сияпаттар табыс етілді. Атап айтсақ, «Ең жайлы бөлме» номинациясы бойынша №15 бөлмеде тұратын А.Бабенко, И.Радионов, К.Жагипаров, Р.Мұратов, №21 бөлмеде тұратын В.Кравец, Е.Крылов, И.Подшивалов, Н.Маренин және №19 бөлмеде тұратын З.Ноғайбаева, А.Падерова, Л.Шикова марапатталды. «Тағамханаға көмектескені үшін» номинациясы бойынша Т.Францева және М.Гуссер, «Еңбек терапиясына белсенді қатысқаны үшін» номинациясы бойынша М.Гуссер, А.Гроссу, Е.Крылов, Л.Дрибос, П.Самойлова, Е.Параскив, В.Кравец, А.Федьков, «Орталықтың өміріне белсенді қатысқаны үшін» номинациясы бойынша Н. Чернякова, «Шахматты жақсы ойнағаны үшін» » номинациясы бойынша В.Хмара және У. Будюкин марапатталды.

Мерекелік шараға Черняев ауылдық мәдениет үйінің «Сударушки» вокальдық тобы арнайы келіп қатысты. Өнер ұжымы әннен шашу шашып, мерекенің көрігін кіргізді.

Көрермендер вокальдық топтың өнерін жылы қабылдап, қол шапалақтап, қошеметтерін аямады.

Өз кезегінде қарттар көрсетілген сый-құрметке дән риза болып, алғыстарын білдірді.

Осылайша, мерелік шара көтеріңкі көңіл-күймен аяқталды.

Айта кетерлігі, «Сударушки» вокальдық тобы да қарттарға ықылас көрсетіп, үлкен торт сыйға тарту етті.

Жаңабай АХМЕТОВ

Суреттер автордікі