Главные новости Карасуского района – Qostanai Media

Өмірлік қиын жағдайға тап болған жандар тегін арнаулы әлеуметтік көмек алуға құқылы.

Қарасу ауданы бойынша мұндай көмек түрін «Арнаулы әлеуметтік көмек көрсету орталығы» мемлекеттік мекемесі ұсынады. Қазір аталған ұйымда 24 әлеуметтік қызметкер бар. Олар 68 адамды қамқорлыққа алған. Соның 4-еуі мүгедектігі бар бала, 4-еуі кәмелеттік жасқа толған бала, қалған 60-ы жасы келген қариялар.

Әлеуметтік қызметкер деп отырғанымыз — жалғызілікті қарттар мен мүгедектерге үйде әлеуметтік қызмет көрсететін маман. Олар жанқиярлық еңбегі мен тынымсыз қамқорлығы арқылы қарттарға қамқор болады. Мүгедектігі бар адамдарға шынайы құрметпен көмек көрсетеді.  Біздің ауданда мұндай мамандарға сұраныс жоғары.

Қарасулық Елена Прокопьева 11 жылдан бері әлеуметтік қызметкер болып еңбек етуде. Ол өзінің қамқорлығындағы жандарды туысындай көреді. Қарттардың жағдайына алаңдап, жұмысына жанашырлықпен қарайды. Апта сайын кесте құрып, соған сәйкес қарттардың үйлерін аралайды.

– Әлеуметтік қызметкер адамдарға мейірім мен жылулық сыйлайды. Кейде біздің жасаған әр жақсылығымыз еке есе болып өзімізге қайтып жатады. Менің жасым  қазір 65 те. Төрт жыл бұрын зейнеткерлікке шықтым. Соған қарамастан жұмысымды жалғастырудамын. Себебі өзіме ұнайды. Қамқорлығымды бес адам бар. Олардың үйіне аптасына екі рет барамын. Еденін жуып, азық түлік апарып беремін. Қыста есік алдының қарын аршимыз. Жазда бақшаға қараймын. Қамқорлығымдағы адамдар сырқаттанып қалатын кездері болады. Ондай сәтте кестедегі уақытта күтпей дәрі дәрмек апарып береміз. Олар маған сенім артады. Мені жақын туысындай сағынышпен күтіп отырады,-дейді Елена Прокопьева.

Қымбат ДОСЖАНОВА