Рахат Дабыл – халықаралық фестивалде Күміс жүлдегер атанды

Қырғызстан елінің Ыстық-Көл жағасында жауынгерлік өнерден халықаралық фестиваль өткен болатын

Байрақты бәсекеге әлемнің 8 елінен 3000-ға тарта спортшы қатысып, өзара бақ сынады. Қатысушылар жекпе-жектің көпшілікке танымал 9 түрі бойынша сайысқа түсіп, өзара мықтыны анықтады.

Аталған спорттық бәсекеге Қостанай облысының жекпе-жек одағының шәкірттері де қатысып, жақсы нәтиже көрсетті. Олардың қатарында біздің ауданның спортшылары да бар. Соның бірі – Рахат Дабыл. Ол аталмыш жарыста күміс жүлдегер атанды. Рахат Октябрь ауылының «ШахНұр» спорт клубының шәкірті. Оны жарысқа шыңдаған бапкер – Шахбоз Халметов.

Осылайша жерлесіміз дүбірлі додада ерекше көзге түсіп, ауданымыздың атын тағы бір асқақтатып қайтты.

Жас өрен кішкентай кезінен бастап спортпен айналысып келеді. Бастапқыда оның грек-рим күресіне деген қызығушылығы оянып, кейін осы спорт түріне жаттыға бастайды. Уақыт өте келе, қоян-қолтық ұрыс, жекпе-жекке ден қойып, бүгінде осы спорт түрлерімен шұғылдану үстінде.

Рахаттың спорттағы жетістіктері жетерлік. Ол өзінің табандылығы мен еңбекқорлығының арқасында қоян-қолтық ұрыстан аудандық, облыстық және республикалық деңгейдегі жарыстарда топ жарып, бірнеше мәрте жүлдегер атанып үлгерді. Әлі де талай биік белестерді еңсеретініне сенімдіміз.

Жаңабай АХМЕТОВ