Главные новости Карасуского района – Qostanai Media

Екі дүниенің сардары Мұхаммед пайғамбарымыздың (с.ғ.с.) туған күнін ел болып атап өту жылдағы дәстүрге айналған игі шараның бірі. Шарапаты мол ұлық мереке қазір ел көлемінде тойланып жатыр.

«Қарамырза» мешітінің ұйымдастыруымен Октябрь ауылында да қасиетті Мәуліт мекересіне арналған «Тағылым Пайғамбары» атты рухани кеш өтті.

Салтанатты шара Пайғамбарымыздың (с.ғ.с.) өмір жолынан сыр шертетін «Адамзаттың ардақтысы» атты бейнероликпен ашылды.

Одан кейін аудан мешітінің бас имамы Халық қажы Қабиұлы және көршілес Әулиекөл ауданына қарасты Құсмұрын кентінің имамы Омар Закарин барша қауымды Мәуліт мерекесімен құттықтап, Мұхаммед Пайғамбарымыздың (с.ғ.с.) көркем мінезі, тағылымға толы өмірінен уағыз-насихат айтып берді.

Мәні мен мазмұны терең ауқымды шараға жиналған жамағат діндарлармен бірге ардақты Пайғамбарымызға (с.ғ.с.) салауат айтты. «Пайғамбарға хат» атты тәрбиелік маңызы зор тағы бір бейнероликті тамашалап, ерекше әсерге бөленді.

Кешті жүргізуші Әйгерім Сакен адамзаттың асыл тәжі болған Алла елшісінің (с.ғ.с.) өмірі жайлы викториналық сұрақтар қойып, дұрыс жауабын тапқан көрермендер сыйлықпен марапатталды. Мектеп оқушылары мен балабақша бүлдіршіндері мерекеге орай дайындаған тақпақтарын оқыса, жас әнші Дәулет Махмутов және «Беседушка» вокалдық триосы имандылыққа жетелейтін әсем әндерді көптеп шырқады.

Кеш барсында «Қарамырза» мешітінде 10 жылдан астам уақыт еңбек етіп келе жатқан Нұржамал Тұрсынбаеваға және «Жастар жылына» орай бір отбасыға сый-сияпат табыс етілді. Сонымен қатар мұқтаж жандарға қайырымдылық көмек көрсетілді.

Рухани мәжіліс соңында «Қарамырза» мешітінің бас имамы Серік қажы Салих асыл дініміздің өркендеуіне өз үлестерін қосып, мешітке жәрдемдесіп жүрген бірқатар азаматтарға құрмет көрсетіп, алғыс хат табыс етті.

Жаңабай АХМЕТОВ
Суреттерде: Мәуліт мерекесінен көріністер