Иесіз иттерді жою жалғасуда

Жыл басынан бері аудан бойынша 360 қаңғыбас ит ауланып, көзі жойылды

Жұқпалы ауруларды тарату, ауыл тазалығына нұқсан келтіру, адамдарды қауып алу және талап тастау сияқты мәселелердің қаңғыбас иттерден туындайтыны жалған емес. Ел ішінде бәленшенің иті бәленшені қауып алыпты дегенді де естіп жатамыз.

Мұндай иесіз иттердің өмірімізге қаншалықты қауіпті екенін біле тұра, олардың санын көбейтпеудің, қазірден бастан жоюды дұрыстап қолға алған жөн.

Иә, қаңғыбас иттердің көбейуіне өзіміз себепкерміз. Себебі күшік кезінде асырап, бағып-қағып, кейін өскен соң бос жібере саламыз. Осыдан келіп қаңғыбас итке айналады.

Міне, осындай иесіз қалған көше кезбелері аудан бойынша бүгінде жетерлік. Оларды жою мақсатында ауданымызда қандай жұмыстар атқарылып жатыр? Осы сауалға тоқталып көрелік.

Ауданда қаңғыбас иттерді жою бағытында аудандық ветеринарлық станция жүйелі түрде жұмыс атқаруда. Мәліметтерге сүйенсек, қаңғыбас иттерді жоюға биыл 2 млн 450 мың теңге қаржы бөлінген. Қаңғыбас иттерді жою мақсатында құрылған арнайы бригада бүгінгі күнге дейін 360 ит аулап, көзін жойды. Бұл бағыттағы жұмыстар жалғасуда. Алда әлі 620 итті жою міндеті тұр. Игерілмеген 1 млн 550 мың теңге бар.

Жаңабай АХМЕТОВ